Lappi universitehta, Sámi oahpahusguovddáš ja Sámemusea Siida leat vuolláičállán ođđa ovttasbargosoahpamuša, man ulbmilin lea čiekŋudit guhkesáigásaš ovttasbarggu ja nannet sámeguovllu skuvlen-, dutkan- ja ovddidandoaimma.

Soahpamušas deattuhuvvo earenoamážit ovttasbargu skuvlejumis, dutkamušas ja diehtobuvttadeamis. Ovdamearkan namuhuvvon organisašuvnnaid ovttasbarggus leat studeanttaid hárjehallanvejolašvuođaid ovddideapmi ja sámedutkamuša ehtalaš prinsihpaid čuovvun. Dasa lassin soahpamuša oassebealit sáhttet šiehtadit bargolanjaid geavahusas oahpahusa ja dutkamuša dárbbuide sierra sohppojuvvon eavttuid mielde ja lasihit áššedovdilonohallama.

Ovttasbarggu stivre soahpamušas meroštallojuvvon kordinerenjoavku, masa guhtege organisašuvnnain nammada iežas ovddasteaddji. Vuosttaš doaibmanbaji áigge ságadoallivuođas vástida Sámi oahpahusguovddáš.

Sámi oahpahusguovddáža rektor Eeva-Liisa Rasmus-Moilanen fuomášuhttá, ahte lea dehálaš, ahte ovttasbargu lea plánejuvvon ja ahte sihke sisdoalus ja ovddasvástádusain lea sohppojuvvon ja ahte nammaduvvon olbmot dikšot ovttasbarggu ovddosguvlui.

– Soahpamušas namuhuvvon áššit leat midjiide buohkaide dehálaččat, ja guđege organisašuvnna perspektiiva dáidda temáide lea binnáš earálágan, mii leage dán ovttasbarggu earenoamáš nanusvuohta. Leat jagiid mielde lihkostuvvan ealáskahttit ovdamearkka dihte historjái vajálduvvan duodjeárbevieru. Dat lea dahkkon buori ovttasbarggus museain ja dutkamušain. Dát lea dušše okta ovdamearka das, makkár bohtosat min ovttasbarggus sáhttet šaddat, Rasmus-Moilanen dadjá.

– Ovttasbarggu nannen sámedutkamušas lea midjiide dehálaš. Nannet dutkamuša oktasaš plánema, ovddidandoaimmaid ja diehtojohtima, ja dat buot bálvala viidát olles sámeservodaga, lohká Sámemusea Siidda museahoavda Taina Máret Pieski.

– Lappi universitehtii ovttasbargu álgoálbmogiiguin ja sámedutkamušain lea strategalaččat mearkkašahtti ja nanne maiddái universitehta árktalaš máhttima riikkadási barggu. Ovttasbargosoahpamuš nanne guhkesáigásaš ovttasbarggu ja rahpá ođđa vejolašvuođaid skuvlejumi, dutkamuša ja áššedovdilonohallama ovddideapmái. Lappi universtitehta lea bargan čavga ovttasbarggu Sámemusea Siiddain dutkan- ja ovddidanprošeavttain maŋimus jagiid. Sámi oahpahusguovddážiin ovttasbargu lea álgán jo jagi 2007 rájes, dadjá universitehta rektor Antti Syväjärvi.

Ovttasbargoguoimmit deattuhit, ahte soahpamuš dahká vejolažžan ođđa ovddidanprošeavttaid ja searvvušlaš oahppanmálliid ráhkadeami ja guovllu eallinfámu doarjuma.

Lassidieđut:

Eeva-Liisa Rasmus-Moilanen, rektor, Sámi oahpahusguovddáš
Tel. +358 50 571 9562
ovdanamma.sohkanamma (at) sogsakk.fi

Taina Máret Pieski, museahoavda, Sámemusea Siida
Tel. +358 50 535 1574
ovdanamma.sohkanamma (at) samimuseum.fi

Antti Syväjärvi, rektor, Lapin yliopisto
Tel. +358 400 606 244
ovdanamma.sohkanamma (at) ulapland.fi